मै अभागा भैजि तेरो- मै अभागण बैणि तेरो (ईजा बौज्यु हुणा मेरो)

अछो….. बैणि
आ खिले दे तौलि भात
भँट्ट डुबुक मुलि थैचि नूर्णि स्वाद
आ खिले दे कुरैट लागि रे तौलि भात
अगिल महैणु यु पैठु
तूँ बनलिल ब्यौलि बैणि
जबै सजल यु डोला तेरो
भैजि आँख्युमा नि चैई बैणि
भैजि आँख्युमा नि चैई बैणि
मै अभागा भैजि तेरो
ईजा बौज्यु हुणा मेरो

ओ म्यर भैजि
रुँले रुँले बै बात करन छै
सुनले भैजि मेरो बात
ईजा बौज्यु हुणा मेरो
डौ (शिकायत) ले कुँछि तेरो भैजि
मै अभागण बैणि तेरी
कस छि ईजा बौज्यु रुप रे तेरो
त्वैमा देखि छँवि रे भैजि
त्वैमा देखि छँवि रे भैजि
तूँ छै मेरो ईजा बौज्यु
कभै नि छोडुण तेरो साथ
सुनले भैजि मेरो बात
कभै नि छोडुण तेरो साथ
रुँले रुँले बै बात करन छै
घुत मा लागल दुँल्हा तेरो
मि नि करनु ब्याँ हो भैजि

समाज निठुर छू बैणि मेरो
नौ धराँल रे मैसि मैमा
ईजा बौज्यु र्फज छै मेरो
सुनले मेरो बात रे बैणि
ईजा बौज्यु…
रात स्वैण मा ऊणि मेरो
बस त्यर बार मा पुछणि बैणि
बस त्यर बार मा पुछणि बैणि
मै अभागा भैजि तेरो
ईजा बौज्यु हुणा मेरो

नि कर भैजि मैथे बात
कुटि (नाराज) छू रे तेरो साथ
नि कर भैजि मैथे बात
मै अभागण बैणि तेरी
जबै ले जुण रे त्वैगे छोडि
तूँ कसके रोले भैजि मेरो
कौ पकालु तेरो भात
मेलि कुचलि लुकडि (कपडे) तेरो
कौ ध्वौल रे भैजि तेरो रे

कै रे भैजि…
म्यर मन पिड़ा नि समझे भैजि
कसि छू सैति पालि त्वील
ईजा बौज्यु प्यार ले तूँ छै
भै बैणि कूँ साथ ले तूँ छै
तेरो मेरो युँ बँन्धन
कसकै छोडु रे बँन्धन
बोल रे भैजि
मै अभागण बैणि तेरी

ओ रे बैणि…
हाथ कु रक्षा धाँगा बैणि
सुख दुख कि छै तूँ बैणि
म्यर मन धाँकणा (इच्छा) पुर करदे बैणि
मै अभागा भैजि तेरो
पाई पाई जोडि बैणि तेरो
त्यर ब्याँ करनु सुपणियु मेरो
ओ रे बैणि…
जबै तूँ बणलि ब्यौलि बैणि
सात फैरो मा रैँगि रैँगि
म्यर आँख्यु कु आँसू मा
पराई अमानत छै तूँ बैणि
रोक सँकु ना त्वैगे बैणि
ना युँ आँख्यु कु आँसू बैणि

सुनले मेरो बात रे बैणि
जबै सजल युँ डोला तेरो
भैजि आँख्युमा नि चैई बैणि
भैजि आँख्युमा नि चैई बैणि

मै अभागा भैजि तेरो
झट पकै दे तौलि भात
भँट्ट डुबुक मुलि थैचि नूर्णि स्वाद
फिर नि जाणि कभै मिल रे
त्यर पकाई हाथु भात
जी भरबै… खँवै दे बैणि आज
त्यर अभागा भैजि भुखो
त्यर अभागा भैजि भुखो

लेख-सुन्दर कबडोला
गलेई- बागेश्वर- उत्तराँखण्ड
© 2013 sundarkabdola , All Rights Reserved